Alf Opheim Optikk 100 år: – Du må kunna stå i stormen i denne bransjen

Sonen til K. S. Opheim, Alf Opheim senior som er far til noverande eigar, tok over butikken som 13-åring saman med mor si etter at Knut Severin døydde i 1933. Rett før krigen gjekk han på urmakarskule i Oslo. Alt på den tida var han ein aktiv idrettsmann. Han var i fleire år på landslaget i alpint, og deltok i OL i St. Moritz i 1948 og i Oslo i 1952.

 

– Ein av hovudgrunnane til at me lever i beste velgåande, er at me har vald å stå i dei faglege stormane som har vore rundt far og seinare mitt faglege arbeid. På denne måten har me bidrege til å utvikla faget vårt. Me driv heile tida og utviklar oss gjennom å vera med på forskingsprosjekt, faglege kurs og seminar, seier noverande eigar Alf Opheim jr.

 

 

Bombing

23 til 25. april 1940 vart Voss bomba av tyskarane. Berre nokre få bygningar sto igjen på Vangen etter bombinga. Butikken til Alf Opheim senior vart totalt øydelagd.– Far mista alt. Men han fekk på plass ei brakke der butikken var resten av krigen. I 1945 fekk han tak i ei tømmerhytte i Hallingdal som han fekk flytta til Voss. Der var butikken fram til 1949. Då byrja han å byggja opp det som no er Opheimsgården. Den fyrste tida var butikken i ein betongkloss. Men i 1959 sto Opheimsgården ferdig slik me kjenner den i dag, fortel Alf Opheim jr.

INTERIØR: Slik såg det ut i butikken i 1953 i lokala i det som etter kvart vart Opheimsgården. Foto: Braatens Efft.

 

Optikar

På 60-talet var det fire urmakarar på Vangen, Alf senior fann ut at han skulle spesialisera seg på optikk. Han reiste til Berlin der han utdanna seg innan faget og spesialiserte seg mellom anna på harde kontaktlinser. Der trefte han tyskaren Hans Joachim Haase, som hadde vore med og utvikla ei anna form for synstestar, der begge auga vert testa samstundes.

– Far fekk stor interesse for slike samsynstestar, som ingen gjorde på den tida. Han tok med seg kunnskap og utstyr heim til Voss og byrja med samsynstestar. Han vart kjend med psykologiprofessor Ivar Lie, som lenge hadde vore interessert i samanhengen mellom syn og mental og fysisk helse. Dei fekk òg med seg den sveitsiske augelegen David Pestalozzi, fortel Opheim.

 

Melde for forskriftsbrot

Måten å tenkja synshelse på slik Alf Opheim Optikk har gjort det, har til tider vore omstridt i legestanden. Verksemda har fleire gonger dei siste 50 åra blitt melde til styresmaktene av legar for ulike forskriftsbrot

– Men me har hatt gode støttespelarar i mellom anna ein helsedirektør, to helseministrar, ein fylkeslege og pasientforeininga i Hordaland. Ingen av meldingane for forskriftsbrot har ført fram og dei som melde oss har måtta trekkja tilbake meldingane sine. Me har fått erstatta mykje av det me har måtte nytta til juridiske prosessar. Det enklaste ville jo vera å trekkja seg unna. Men me har vald å ta opp kampen. Etter kvart har det vist seg at det er godt fagleg grunnlag for å driva slik me driv mellom anna frå ei større vitskapeleg undersøking på NTNU. Men det vert framleis diskutert, og det er mange mytar der ute. Men for oss er det pasientane som tel, og at dei får ei betre synshelse slik at dei fungerer betre på skule og jobb, seier Alf Opheim jr.

 

 

Sjekk synet til born tidleg

Opheim brenn for born si synshelse som han meiner ikkje får nok merksemd.

– Me får til å hjelpa dei aller fleste som kjem hit, så sant det ikkje er uoppdaga bakanforliggande årsaker av medisinsk natur. Om det vert oppdaga augesjukdomar med nevrologiske årsaker, vert dei sende vidare til lege. Eg har mange gonger oppdaga at nokre av augeproblema folk har hatt, har vore der sidan barndomen. Difor skulle eg ynskt at born si synshelse hadde vore sjekka grundigare og oftare enn det blir gjort i dag. Om dei startar på skulen som 6-åringar og har problem med synshelsa som ikkje vert gjort noko med, kan det få verknader for heile livet. Det dreier seg om at betre synshelse gjev betre livskvalitet, seier optikar og optometrist Alf Opheim.